(Zawngna pan a Dimlet Nuntakna)

A masa in i Topa in ama hoihna le ama hong ompihnate teci pang thei dingin hun manpha hong pia ahih manin Topa min ka phat hi. Tua khit teh hi banga hun hong pia Agape Digest tanute tungah zong lungdam mahmah ing, cih ka lungdamna hih mun panin hong pulak nuam pha lai ing.

Kei pen ka pa in hong nusia baihin tagah baih mahmahin ka nu tawh a khangkhia khat ka hihi. Ko unau mi thum lak panin kei pen a lai hi-in, tu-in ahih leh ka nu le ka u in hong nusia khinin, ka nau tawh ko unau nih bek adam lai ka hi uh hi.

Ka pa in hong nusiat lai-in ka nu pen khangno lai mahmahin  a it a ngai zong na tam mahmahin, zi dingin na kidongh keei himah tase leh, kua mah na sang lo hi. Ka nu in ka sungpana piang ka tate ken nusia leng kua mah’n hong donsak lo dingin hong khuasuak zo lo ding uh ahih manin, ka tate nusia liangin pasal ka nei hetkei ding hi, na ci hi. A tate hong it hong khual mahmah nu khat ka neihkhak manin ka lungdamin zong ka angtang mahmah hi. Tua mah bangin mi tawh kitawng le ung zong kua mawh kua khial a cihte kan masa tuan loin mi tawh ka kitot limlim nak uh leh, ka nu in “Mi tawh kitawng thei lo ding, hong ci hi lo ka hi hiam,” ci-in ko a tate hong tawngin hong sat hamtangin, itna le deihsakna tak tawh hong thuhilh den hi. Bang hang hiam cih leh, mite pen a huh a panpih ding  nulepa le sanggam ulenau kicing uhin, eite ihih leh hong huh hong panpih ding u le nau kicing om lo hi hang. Eite hong huh hong panpih ding ahih leh Pasiang bek om hi, ci-in ka nu in thu hong hilh tawntung ahi hi. Pasian thu tawh zong nakpi takin hong pantahto ahih manin ka lungdam mahmah hi.

Kei pen ka neutung panin khamtheih guihtheih le zulesa cihte zang vet loin pumpi a siangtho mahmah mi khat ka hi hi. Ahizongin Pasian thupha i ci ding hiam? Lawmngai-in nungakte khawng hopihin va pat sawm leng kua mah’n hong hopihnuam khollo uhin hong kingai khollo bilbel hi. Hih zong bel Pasian thupha mahin ngaihsun ing. Banghang hiam cih leh ka kithuahpih ka lawm kagualte pen kei sangin a mel uh hoih zaw ngaihbaang zaw cih bang hi tuanlo napi-in nungakte’n ngai thei bilbel uh hi. Ka lawmte pen sawci thei mahmah uh hi. Ahizongin leitung gualnopna lamah tai lua uh ahih manin Innkuan lam man lo (Zi nei man) in pawlkhatte in sihna hanmual lam hong zuatsanin na khansih  mawk uh hi. Hih ka lawmte pen nulepa tawh omkhawmin ulenau zong a kicing mahmahte hi uh hi. Leitung nuntak nuam a sa mahmahte hi napi uh in ahizongin ong khantom sese uh hi. Hih ka lawm ka gualte nuntakna ka et ciangin ka deihtel ahih sam loh hangin tagah baihin  ka nu tawh ka khankhiat pen – midangte bel gen thei keng- kei aa dingin Pasian in a hoih pen dinga  hong na gelsak ahih lam tak, le a piang na khempeuh ah Topa hehpihna phat ding ahih lam hong phawksak sansan hi.

Nuntak haksa lua mahmah ahih manin sum thalawh dingin saklam ( Mizogam) ah kum giat sung khawng ka na zin zel a, upmawh le ngaihsut bangin sum kingah zuahzuah tuan khollo hi. Tua manin singtang vakte zong lawhcing thei sam uh ahih teh, ci’n kum nih sung khawng singtang ka na vak leuleu hi. Tua zong upmawh hong bang tuanlo ahih manin a tawpna ah bang ngaihsun ta ka hi hiamcih leh, Pasian deihna tawh a kituak loh hangin vankham semte pen senpi uhin nuamsa mahmah uh ahih manin kei zong tua vankham semte engin, vankham sem dingin ka lungsim ah khentatin, zong ka sem takpi mah hi. Kei zong vankham sem ka meltheihte pawl bawlin khualzin ka kipan pah hi. Vial tampi zong  a pai hi nailo, ka khat vei paina lian ah mite’n a gentheih zel uh, ‘hau nuam lua kisa si phot zawzen’ a cih dan mah vua, khat vei pai panin hong kiman pahlian ahih manin hau man loin Mizogam, Aizawl Central Jail ah va tawlnga hithiat phot kha hi ing. Hong kimanin thongkia kihi ta ahih manin suahtak theih nading lampi pen sum tawh kitat ding bek hong hita hi. Mite banga neihval lamval cihte om lo ahih manin a tawpna ah ka neih lian pen uh ahi innpi mah zuak mai-in thongsungah kum khat le kha sawm khawng ka om khit ciangin sum tawh ka kitanh thei hi. Kum nih dektak bang thongkia-in ka suahtak khit teh ka nuntakna kikhelsawm nai tuanloin vankham sep ding mah hong omlai-in, zong ka semlai takpi hi.

Khat vei Tamu lam ah ka vazin leh tadenngah ci-in lamkal panin ka tuanna mawtaw hong kikhawlsak lianin hong kisit ziahziah tak teh ka lungsim hong puakkham taktak ta-in Topa tungah ka lungsim tawng panin thu ka ngen pah hi. “Topa aw, tu-a taktak nong suahtaksak leh ka nuntaksung tawntungin nangma deihloh vankham a kici limlim tawh ka kisukha nawn peuhmah kei ding hi,” ci-in lungsim tamzanin thu ka ngen hi. Topa’n mawhnei kei mah a tapa ii ka thumna ka taunate hong za-in hong dawnga, tua mun ah mat le hen tuak theih nading panin Topa’n a vanglian khut tawh hong lenin hong honkhia ahih manin hong suaktasak takpi hi. Tua ni a kipanin tuni dongin Pasian’ tungah ka kamciamna a om mah bangin vankham le ama deihloh nasepte peuhmah sep ding ka lungsimah zong om nawnngiat loin ka kikhelzo takpita hi. Halelujah.. Amen….

Topa’n ka nuntakna hong khel huna kipan ka tup ka sawmnate khempeuhah a beisa hunte bang hong hi nawnloin a kikhak ka lampite hong kihongin ka ma hong pai-in innkuan sung nuntaknate ahzong khat le khat kimaitai-in thu le la kikumkhawm diamdiamin innkuan nuam mahmah khat in Topa’n hong bawl hi.. .Amen.

A masa lama ka gen mah bangin ka neulai in kitagah luain kihaksa mahmah hi. A haksa ahzong haksa mawkmawk hi loin kiphatna loin haksa cih takin a haksa  hi mai ung. Ka nu in Tahan le Sai Khua lam khawngah van vatanh to zelin zingsangin Leipi zyi ah zuak zel hi. Tua bangteng tawh a kinungta ahih manin – cimai leng – neulai in bel mite neihsa teng eng le deihgawh bek tawh a nungta hi ung, ci leng zong kikhial lo ding hi. Ahizongin Lai Siangtho sungah meigongte lamah pangin tagahte’ Pa ka hi a ci, a Vanglian Pasian in hong nusia loin hong cingin hong kem denin hong pattah toto takpi a, neulai-in mite neihsa engin deihgawh bek tawh a nungta mi khat ka hih hangin Topa lamah kihei-in Ama deihna bangin ka nuntak tak teh mizawng mi cimawhte le meigong tagahte le a haksa mite ahuh kik zo dingin Topa’n hong bawl hi. Tua bek zong hi loin ka nuntakna a ding a kul le a kitangsam na khempeuhte Topa in hong sik ngiat hi, cih thu Teci ka pan nopna thu lian pen ahi hi.

Ka tangval tung lai pawlin nungakte va naih bawl mah leng, kua mah’n hong nehpik nuam lo uh hi mah tase leh Topa sung ah ka nuntak tak teh ka nuntakna a ding a kisam mahmah ka nakguh pen a hun a cin ciangin Topa in hong musak lel hi. Amen. Tua ahih manin Nungak tangvalte aw, na zi ding na pasal ding khawng nangma ii thatang hat thu, na lungsim, le na mit tawh zongin muh ding ngaihsunin hanciam lua kei in. Topa tungah ki-ap in. Ama deihna bangin nungta peuh lecin Topa in na kisapnate khempeuh a hunlapin hong sik hong pia lua ding hi, cih zong nungak tangvalte hong hanthawn nuam pak hi ing ei maw.

Ka Pianthakna

Pianthakna tawh kisai zong teci hongpang nuam lai ing. Pasian ii hong itna le hong gupkhiatna thu tellian nailopi-in ka Nu in hong sawlna tawh May 25,1985 kum in tui ka kiphum hi. Ka khankhiatna pawlpi pen Leipi Tuiphum Pawlpi hi-in pawlpi in kumsim in Youth Camp vaihawm den uh himah ta leh, kei pen khualzin baih  mi khat ka hih manin om kha ngeiloin kihelkha ngeilo hi ing. Ahizongin hun hong paitoto in June 16-22, 2007 kum in Yangon North Dagon Sya Tun Lyin kiang ah kal khat sung bang Pasian thu ngai-in ka va kihelna sung panin Jesuh pen ka honpa le ka gumpa bek zong hi loin, kei thuaktang ding hong thuaksakin kei septang ding hong sepsak Pa ahihna pen tel takin thei ka hih manin tua pan kipanin a piangthak pan, Kha muanna taktak a ngah pan le Pasian’ mi taktak ka hihna a tel pan ka hi hi.

A tawpna ka thukhupna dingin Late 37: 4-5 na sungah “4Topa sungah lungkim in; amah in na deihna hong pia ding hi. 5Topa tungah na vai teng ap in. Amah muang in;amah in hong sem ding hi.”

Hih ka teci panna a simkha mimal kim Topa in hong lawng ngiat hen la, Ama sungah a lungkim zo ngiat dingin i biak a Vanglian Topa in thupha hong piakim ngiat tahen. Amen. Ka lungdam.

Dal Mang Thangum(Agape Family)